بودكاست نهارالوطني :هدية لصحاب الباااك
🚴 وجد راسك حيت في هاد المقال غادي نديك معايا في رحلة محتاج ليها بزاف ، غادي تنفعك و غادي ترجع منها إنسان آخر و بنفسية أخرى ، 😏باش عرفتها؟ حيت مني كنت قدك تمنيت كون شي حد عرض عليا لرحلة بحال هادي ، يالاه دابا باراكا من الهضرة باش مانتعطلوش 👇
نبداو من ليلة الوطني، كاين اللي غادي يطير عليه النعاس 🤪 و كاين اللي غادي يدخل في غيبوبة 😴 كاين اللي غادي تفتح ليه الشهية 🍝🥘 وكاين اللي ماغاديش يقدر ياكل 🤢 ،كاين اللي غادي تطلع ليه التبويقة و ينشط 😁 و كاين اللي غادي يطلعلو الزعف و يسعر 😡😠 و كاين اللي غادي يجمد مايبقا باغي يدير والو 🤖 ،الحاصول كل واحد و طبيعتو ، بغيتك من دابا تقبل أي تغير طرأ على نفسيتك و عنداك ثم عنداك تفسرو بأنك نسيتي و ماوجديتي والو و غير تتخربق و تلفتي….. ها أنا وصيتك .
🌄صباح غادي تفيق قبل الوقت بزاااااف ، غادي تمشي تصلي ، واخا تكون ماتاتصليش ( وماشي عيب أنك تلتاجأ لله في داك النهار ربما تكون سبب أنك تولي تصلي ديما ) ، غادي تحس بالهدوووووء، وتستغرب أنه النهار في شكل، و غادي تمشي تهز شكارتك و تحقق من لاكارط 🃏و الأدوات⚒️ و الإستدعاء 📃 ، ولكن غادي تكون تالف ، تقدر تلف على الشكارة و تقدر تدوخ و تخلع و تحس راسك نسيتي شي حاجة و ترجع تفلي أدواتك واحد واحد ، وتسول راسك واش تهز الكتوبة ولا بلاش …🤔🤔
كاين اللي غادي يفيقو معاه الدار كاملين، وكاين اللي غادي تفيق معاه الميمة وكاين اللي غادي يفيق غير بوحدو ووو…. المهم غادي توصل الوقيتة باش تخرج .
👣في الطريق غادي تسمع الصوت ديال داك الفرخ اللي تيكون في الصباح (داك اللي كان تايحساب ليك بومة فاش كنتي صغير 🦉)، سواء كنتي غادي على رجلك ولا موصلك شي حد ولا غادي للمحطة تشد الطرونسبور ، وسواء كنتي غادي بوحدك ولا معاك الدعم ، غادي تحس بالهدوء ، والبرودة و تحس بحال إلا باغي ترجع فحالك و مامتيقش ، وتبقا تقول لراسك ،ويلي ويلي أنتشوه 😁، ميمتي كلشي مشا دماغي تمحا ، واش أنا سطل …، وغادي تفكر في صحيبك اللي ماكنتيش تفارق معاه ماعرت آش حاس، ولكن غادي تدير فيها حديدي وجامع راسك😊، سبحان الله داك الصباح أتجيك واحد التباتة ..يا سلام .
🏫ومني غادي تقرب لليسي و تدور من ديك الدورة اللي غادي يبدا يبان ليك 😲، غادي تصدم ، يا إلاهي ، واشحال ديال البشار 👥👥👥 ، و الواليدين مساكن معمرين الليسي كتر من التلاميذ ، والبوليس و غادي تسمع وز وز وز كلشي تيدوي 😑، و هنا كاين اللي غادي يوصل يعيطو عليه الكليكة ديالو يبدا يدوي معاهم مايسكتش، كاين اللي غادي يقلبها طنز و ضحك مع صحابو، و كاين اللي غادي تشدو مامات صاحبو تبدا تنصح فيه، و كاين اللي غادي يبداو يخلعو فيه صحابو، واللي غادي يبداو يعياقيو عليه، وكاين اللي غادي يشد الركنة و يكرم ، غادي يقطع الحس😶 بيدما دخل باش يحافظ على تركيزو(أفضل ذلك).
⛩️ أيتحل الباب ،أتدخل أول حاجة أتجيك في بالك نارييي عنداك غير نتلف و مانلقاش بلاصتي حتى يفوت الحال ، لا ماتخافش غادي تمشي للقسم و غادي تجلس بلاصتك و تجبد قريعتك ديال الما ،ووريقاتك و أدواتك ، وتجلس تدور في عينيك 🙄 .. ناري مال هادو جايبين لينا ربعة المراقبين، شوف داك الأستاذ كي مخنزر، ناري هاديك عقروشة باينا فيها، ناري عنداك غير مايسكتوش دوك الجوج من الجموع و يصدعونا …، و غادي تشوف كولشي تاجه بأنظارو عند الباب و كلشي سقل ، حتى داك الصرصور ديال الأفلام ماهايدويش 🦗، حيت جاو الوراق 📑 ، غادي ينوضو داك المنحوس اللي جات فيه الطويلة اللولة يسني بأنه الأوراق كانو مسدودين( أنا كنت من المناحيس) ، و غادي يبان ليك الأساتذة بداو يفرقو، وا ناري أيخليك نتا و يبدا من القنت ، و أتبقا تمنظر في صحابك تيشدو الوراق؛ وتشوف في التعابير ديال وجوهم 😑😶😲🙄😊😌… حتى توصل ورقتك، أتشوف الأستاذ تيحطها بالعرض البطيء، وغادي يدوز،
📃 هنا غادي تشد الوراق و نتا مامتيقش ، أول حاجة غادي تحسب شحال وواش ريكطو فيرسو🤔، ومن بعد غادي تبدا تقرا ، و مني غادي تسالي القرايا الأولية غادي تلف ، تقدر كاع تلف على سميتك تكتبها ، وماغاديش تعرف واش جاك ساهل ولا صعيب ،وواش أتبدا ، ولكن هنا غادي تفاجئ ، غادي يجي سوبرمان .. جيتك تانزيد فيه ؟ وا كمل بعدا ، غادي يجي سوبرمان اللي هو نتا ، سبحان الله وسط ديك التلفة و الدوخة و الخلعة ،غادي تلقا راسك هاز الستيلو خدام، كيما كان الحال ، كنتي قراي ولا بين وبين، كنتي موجد مزيان و لا لا ، كنتي مكمل الحفاظة ولا منقز شي دروس …، غادي تبدا خدام بوتيرتك و دقا دقا داكشي اللي عرفتي ،حتى يسالي الوقت أتحط الورقة ،وأتكتاشف أنك ماتسوقتيش للمراقبين مني دازو عليك، ووقفو حدا راسك وقلبو ليك الوثائق….، بالعكس غادي تحس الوقت داز طاير ،
🕴️ مع الخرجة أتلقا بنادم تيسول فيك، يقدر يكون ماتايعرفكش ، كي داز الإمتحان، غادي تقول ليه مزيان، ونتا ماعارفش ، واش خدمتي مزيان و لا لا ، حاس راسك درتي اللي عليك ولكن باغي تنسا هاد المادة حيت تابعك غيرها ، وغادي يدوز النهار الثاني و الثالث ولكن أتكون ولفتي، ولات عندك مناعة 💪.
وغادي تسالي و يدوزو شي أيام و تلقا راسك حققتي نجاحك و جبتي الكارطونة ، وا قول آمين .
و دابا عرفتي علاش ديتك لهاد الرحلة؟ باش تواجه مخاويفك ها واحد، وباش تعرف آش مسنيك ها جوج ، وباش تعرف انه واخا تجيك الخلعة و الدوخة… راك غادي تدوز مزيان 💪.
ماتنساش تطاغي خوتك اللي في الباك ،ربما تكون سبب في راحة غيرك ، وماتنساش تخلي تعليق تقول لينا كي كنتي متخايل نهار الباك قبل هاد الرحلة 👆
#منقوول
#Podcast_motivation
#Nhar_lwatani
